ՀԱՅԱՍՏԱՆՈՒՄ ԱՆԱՍՆԱԳԼԽԱՔԱՆԱԿՆ ԱՎԵԼԱՑԵԼ Է
18.03.2015![ՀԱՅԱՍՏԱՆՈՒՄ ԱՆԱՍՆԱԳԼԽԱՔԱՆԱԿՆ ԱՎԵԼԱՑԵԼ Է ՀԱՅԱՍՏԱՆՈՒՄ ԱՆԱՍՆԱԳԼԽԱՔԱՆԱԿՆ ԱՎԵԼԱՑԵԼ Է](/resources/raed/img/news/main/1426663752,35.jpeg)
2015թ-ի հունվարի մեկի դրությամբ Հայաստանում խոշոր եղջերավոր կենդանիների գլխաքանակն ավելացել է 1.5%-ով, կովերինը` 1.4%-ով, խոզերինը` 2.4%-ով, ոչխարներինը և այծերինը` 1.5%-ով: Այս մասին տեղեկությունը տրամադրում է Ազգային վիճակագրական ծառայությունը:
2015թ. հունվարի 1-ի դրությամբ գյուղատնտեսական կենդանիների ամենամյա համատարած հաշվառումն անց է կացվել հանրապետության բոլոր տնտեսություններում տեղական ինքնակառավարման մարմինների կողմից:
Գյուղատնտեսությամբ զբաղվող առևտրային կազմակերպությունների ցուցանիշները հավաքագրվել են վիճակագրական հաշվետվությունների միջոցով:
Գյուղատնտեսական կենդանիների համատարած հաշվառման տվյալների արժանահավատության գնահատման նպատակով 2015թ. հունվար – փետրվարին ՀՀ ազգային վիճակագրական ծառայության կողմից հանրապետության բոլոր մարզերի 313 գյուղական բնակավայրերի 10 192 գյուղացիական տնտեսություններում անց են կացվել գյուղատնտեսական կենդանիների հաշվառման արդյունքների ստուգաճշտումներ:
Նշենք, որ նույն ԱՎԾ-ի տվյալների համաձայն, Հայաստանում կաթի արտադրության ծավալները, 2014թ-ի հունվարի հետ համեմատած, աճել են 4.3%-ով և կազմել 17.1 մլն լիտր: Միևնույն ժամանակ, մածունի արտադրության ծավալներն աճել են 2.1 անգամ և կազմել 439.9 տոննա, թթվասերի արտադրության ծավալներն աճել են 2.4 անգամ` կազմելով 459.6 տոննա:
Կաթնաշոռի արտադրության ծավալները նվազել են շուրջ 19%-ով և կազմել 65.1 տոննա, իսկ պանրի արտադրության ծավալն աճել է 3.5 %-ով և կազմել 956.2 տոննա:
Եթե ըստ ԱՎԾ-ի, կաթնարտադրությունն ու անասնագլխաքանակն ավելացել է, սակայն կաթնամթերքը թանկացել է: Պաստերիզացված կաթը թանկացել է 0,7 տոկոսով, կեֆիրը՝ 1,1 տոկոսով, թթվասերը՝ 0,3 տոկոսով, կաթնաշոռը՝ 0,9 տոկոսով, չանախ և լոռի տեսակի պանիրները՝ համապատասխանաբար 1,6 և 0,9 տոկոսով: Խտացրած կաթը թանկացել է 3,7 տոկոսով:
Նշենք, որ 2014-ի դեկտեմբերին նոյեմբերի համեմատ կաթնամթերքը թանկացել էր 5,8 տոկոսով:
«Սպառողների խորհրդատվություն կենտրոն» հ/կ-ի նախագահ Կարեն Չիլինգարյանը մասնավորապես անդրադարձել էր կաթնամթերքի շուկային, նշելով կաթնամթերքի թանկացումից, ասել է, որ ոչ միայն կաթնաշոռը, թթվասերը, պանիրն են թանկացել, նաև կաթնամթերքի քաշն է նվազել:
Մսամթերքի ապրանքախմբում 2015 թ. փետրվարին 2014 թ. փետրվարի համեմատ գրանցվել է 8.0%, իսկ 2015 թ. հունվարի համեմատ` 0.4% գնաճ: 2015 թ. փետրվարին հունվարի համեմատ հանրապետությունում արձանագրվել է աղացած մսի` 0.3%, տավարի, խոզի և ոչխարի մսերի` համապատասխանաբար 0.3%, 0.6% և 0.8%, նրբերշիկի՝ 1.1%, տավարի մսի պահածոյի՝ 1.7%, կիսաապխտած և եփած երշիկների՝ 1.8% և 2.3%, պելմենիի՝ 2.5% գնաճ:
2015թ. փետրվարին հունվարի համեմատ Գավառ, Երևան և Իջևան քաղաքներում արձանագրվել է մսամթերքի 0.3-3.5% գնաճ:
Հայաստանում 2015 թ. հունվարի 1-ի դրությամբ մշտական բնակչության թվաքանակը կազմել է 3 մլն 10 հազար 600 մարդ, թվաքանակը 2014 թ. հունվարի 1-ի տվյալների համեմատությամբ, նվազել է 7000 մարդով:
Այնպես որ, կարծես թե ոչ անասնագլխաքանակի ավելացումից, ոչ կաթնարտադրության ավելացումից, ոչ ՀՀ մշտական բնակչության, ասել կուզի` սպառողների, պաշտոնական նվազումից` Հայաստանում բնակվող սպառողներին օգուտ չկա, միայն վնաս: