Չնայած միջազգային ֆինանսական հաստատությունների բացասական սպասումներին, առաջին եռամսյակում վիճակագրական ծառայությունն արձանագրել է Հայաստանի տնտեսական ակտիվության ավելացում։ Ինչպես հայտնի է, Արժույթի միջազգային հիմնադրամի վերջին գնահատումներով, կանխատեսվում է համախառն ներքին արդյունքի ընդհուպ մինչև 1 տոկոս կրճատում։ Որքան էլ Համաշխարհային բանկը աճի որոշակի ռեսուրս տեսնում է, այնուհանդերձ միանգամայն հնարավոր է համարում անկման հավանականությունը։

Ի տարբերություն այս գնահատականների, կառավարությունը պահպանում է լավատեսությունը։ Անցած շաբաթվա վերջին ըստ էության արձագանքելով միջազգային ֆինանսական հաստատությունների կողմից հնչեցրած կանխատեսումներին, վարչապետը հայտարարեց գործադիրի տնտեսական աճի դրական սպասումների մասին։ Ըստ այդմ. «Չնայած կան բազմաթիվ կանխատեսումներ, որ ունենալու ենք տնտեսական անկում՝ հաշվի առնելով տարածաշրջանի լարվածությունը, Ռուսաստան-Արևմուտք հարաբերությունները և այն պատժամիջոցները, որոնք կիրառվում են Ռուսաստանի նկատմամբ, այնուհանդերձ ես համոզված եմ, որ մենք 2015 թվականին արձանագրելու ենք տնտեսական աճ»։

Որքանո՞վ կիրականանան կառավարության սպասումները, ցույց կտա ժամանակը։

Մինչ այդ առաջին եռամսյակի արդյունքներով, վիճծառայությունն արձանագրել է տնտեսական ակտիվության 2,5 տոկոս աճ։

Մարտին, նախորդ տարվա նույն ամսվա համեմատ տնտեսական ակտիվությունը կազմել է 2,2 տոկոս։ Աճ է գրանցվել տնտեսության երկու առանցքային ճյուղերում։ Արդյունաբերության արտադրությունն ավելացել է 4 տոկոսով, ինչի շնորհիվ  տնտեսության այս ճյուղում առաջին եռամսյակի տվյալներով գրանցվել է 2 տոկոսանոց աճ։

Հիշեցնենք, որ հունվար-փետրվարին արդյունաբերության անկումը նախորդ տարվա նույն ժամանակահատվածի համեմատ հասնում էր 1,8 տոկոսի։

Ինչպես նախորդ շրջանում, այնպես էլ այժմ տնտեսական ակտիվությանը նպաստող հիմնական ոլորտը դարձել է գյուղատնտեսությունը։ Տարեսկզբի երեք ամիսներին արտադրության ծավալներն այստեղ ավելացել են 4,5 տոկոսով։ Չնայած նախորդ տարվա նույն ամսվա նկատմամբ մարտին շինարարության ծավալն ավելի քիչ է եղել, այնուհանդերձ եռամսյակի տվյալներով, գրանցվել է 0,8 տոկոս աճ։ Տնտեսության ճյուղերից անկում է արձանագրվել  էներգետիկայում։

Լարվածությունը պահպանվում է հատկապես արտաքին հատվածում։ Առաջին եռամսյակի տվյալներով, արտաքին առևտուրը կրճատվել է 28,5 տոկոսով՝ կազմելով 945 մլն դոլարը։ Թեև վիճծառայությունը շարունակում է զգուշացնել, որ այդ ցուցանիշը լիարժեք չի արտահայտում իրական պատկերը՝ պայմանավորված ԵՏՄ երկրների միջև փոխադարձ առևտրի ցուցանիշների ոչ ամբողջական հավաքագրմամբ։

Ամեն դեպքում հրապարակված տվյալների համաձայն, առաջին եռամսյակում արտահանումը պակասել է 23,1, ներմուծումը՝ 30,5 տոկոսով։