ԵԱՏՄ տարածքում այս տարի տնտեսական աճ է սպասվում միայն Հայաստանում։ Թեև ենթադրվում է, որ այն մեծ չի լինի, այնուհանդերձ միության կազմում ընդգրկված մյուս երկրների համեմատ տնտեսական աճի կանխատեսումները դրական են։ Մի բան, ինչը հիմք է տալիս ենթադրելու, որ տնտեսական անբարենպաստ իրավիճակում գործընթացներն ակտիվացնելու ուղղությամբ կառավարության ձեռնարկած քայլերն ավելի արդյունավետ են եղել։ Այլապես նույն խնդիրների առկայության պայմաններում Հայաստանում ևս սպասումներ կլինեին բացասական։

Ռուսաստանի նկատմամբ կիրառվող պատժամիջոցների հետևանքով համագործակցության տարածքում ընդգրկված բոլոր երկրները հայտնվել են միևնույն տնտեսական դժվարությունների առջև։ Սակայն ի տարբերություն Հայաստանի, ԵԱՏՄ անդամ  որևէ այլ երկրներում այս տարի չկան աճի սպասումներ։ Խոսքը ինչպես Ռուսաստանի, այնպես էլ Բելառուսի և Ղազախստանի մասին է։

Ամենամեծ անկումը կանխատեսվում է Բելառուսում։ Ենթադրվում է, որ այն 4 տոկոսից բարձր կլինի։ Սա ոչ թե միջազգային ֆինանսական կառույցների, այլ ԵԱՏՄ տնտեսական հանձնաժողովի մակրոտնտեսական քաղաքականության վարչության գնահատականն է։

Ռուսաստանում անկման սպասումները 2,8 տոկոսի սահմաններում են։ Ղազախստանի տնտեսության վերաբերյալ ևս դրական կանխատեսումներ չկան՝ չնայած այս դեպքում ակնկալվում է անկման համեմատաբար ավելի փոքր մակարդակ։ Ենթադրվում է, որ այն կլինի 1,9 տոկոսի շրջակայքում։

ԵԱՏՄ անդամ երկրների տնտեսությունների վերաբերյալ արված այս կանխատեսումները հիմնականում համընկնում են միջազգային կառույցների գնահատականներին։ Նույնը վերաբերում է նաև Հայաստանին, որտեղ ԵԱՏՄ տնտեսական կառույցները սպասում են Համախառն ներքին արդյունքի 0,9 տոկոսանոց ավելացում։ Այն գրեթե համարժեք է ինչպես Համաշխարհային բանկի, այնպես էլ Հայաստանի կառավարության առաջիկա 4 տարիներին միջինժամկետ ծախսերի ծրագրով արված կանխատեսումներին։ Թեև վարչապետ Հ. Աբրահամյանը բազմիցս հայտարարել է աճի շատ ավելի բարձր մակարդակ ապահովելու ակնկալիքների մասին։

Որքանով դա կիրականանա, ցույց կտա ժամանակը։ Ամեն դեպքում, կառավարությունը, կարծես, հնարավոր ամեն ինչ անում է այդ նպատակին հասնելու համար։

Կանխատեսվում է, որ ԵԱՏՄ ընդհանուր տնտեսությունը ռեցեսիայից դուրս կգա միայն հաջորդ տարի։ Բայց տնտեսական աճի շատ մեծ սպասումներ չկան նաև 2016թ. համար։ Սպասվում է, որ այդ տարի նոր տնտեսական տարածքին անդամագրված երկրների ՀՆԱ-ն կավելանա այնքան, որքան 2015թ. Հայաստանի տնտեսության աճի ակնկալիքն է։