ՀՀ Ֆինանսների նախարարության օպերատիվ հետախուզության և ներքին անվտանգության գլխավոր վարչության օպերատիվ հետախուզության վարչությունն ընթացիկ տարվա առաջին կիսամյակում իրականացրել է բյուջեի հետ փոխհարաբերությունների ճշտության 336 ստուգում, հայտնաբերել է պետբյուջե լրացուցիչ գանձման ենթակա 4.4 մլրդ դրամ գումար, ինչը նախորդ տարվա նույն ժամանակահատվածի ցուցանիշը գերազանցել է 2.2 միլիարդ դրամով: Այս մասին հայտնում են Ֆինանսների նախարարության լրատվական ծառայությունից:

Առանց ուղեկցող փաստաթղթերի կամ սահմանված կարգի համաձայն ուղեկցող փաստաթղթերը չգրանցելու հետ կապված` կազմվել է 1094 վարչական ակտ` 453.3 մլն դրամ գումարով, իրականացրել է 175 մասնակի ստուգում՝ հայտնաբերելով պետբյուջե վճարման ենթակա 44.2 մլն դրամ գումար:

ՕՀ վարչությունն առաջին վեց ամիսներին հայտնաբերել է ապօրինի ձեռնարկատիրությամբ զբաղվելու 122 և առանց լիցենզիայի գործունեության 5 դեպք: Տարեսկզբից ուսումնասիրվել է շրջանառության հարկի դաշտում աշխատող և 40 մլն-ից մինչև 58.35 մլն դրամ իրացման շրջանառություն ունեցող տնտեսվարող սուբյեկտների գործունեությունը: Օպերատիվ հետախուզության վարչության կողմից 324 դեպքով նյութեր են ուղարկվել Իրավախախտումների հայտնաբերման և վարչական վարույթների իրականացման ու Քննչական վարչություններ. 9 դեպքով հարուցվել են քրեական գործեր:

Հայտնաբերված գումարներից պետական բյուջե է վճարվել մոտ 1.6 մլրդ դրամ: