ՍԱՀՄԱՆԱՄԵՐՁ ՀԱՄԱՅՆՔՆԵՐԸ ՆԱև ՍՈՑԻԱԼԱԿԱՆ ՕԺԱՆԴԱԿՈՒԹՅՈՒՆ ԿՍՏԱՆԱՆ
18.11.2014
Բիզնես գործունեության համար նպաստավոր պայմաններ ստեղծելուց բացի, կառավարությունը պատրաստվում է սահմանամերձ համայնքների բնակչությանը տրամադրել նաև ուղղակի սոցիալական աջակցություն։ Խոսքը մասնավորապես գազի, ոռոգման ջրի, էլեկտրաէներգիայի վարձավճարների մասնակի փոխհատուցման, ինչպես նաև գույքահարկից և հողի հարկից ընդհանրապես ազատելու մասին է։
Եթե գույքահարկի և հողի հարկի դեպքում կառավարությունը պատրաստվում է ամբողջությամբ ստանձնել գյուղացիների պարտավորությունների բեռը, ապա գազի, ջրի և էլեկտրաէներգիայի փոխհատուցման չափերը դեռևս հստակեցված չեն։ Ելնելով մի շարք առանձնահատկություններից և բյուջեի հնարավորություններից՝ փոխհատուցման չափերը և վճարման կարգը ամեն տարի կորոշի կառավարությունը։
Սակայն միայն նշվածով չի սահմանափակվի սահմանամերձ համայնքներին տրվող սոցիալական օգնությունը։ Ադրբեջանական զինված ուժերի գործողությունների հետևանքով վիրավորված բնակիչները կստանան անվճար բուժման հնարավորություն։ Պետությունը պարտավորվում է մեկամսյա ժամկետում համարժեք բնակարանով ապահովել նաև ռազմական գործողությունների պատճառով օթևանից զրկված քաղաքացիներին։ Որոշ դեպքերում սահմանամերձ համայնքի բնակիչները կստանան միանվագ ֆինանսական օգնություն։ Այս բոլոր ծախսերը կկատարվեն պետական բյուջեի միջոցների հաշվին։
Սրանով, ըստ էության, ամբողջանում են սահմանամերձ համայնքներում կուտակված սոցիալական խնդիրների լուծմանն ուղղված միջոցառումները։ Մի կողմից՝ փորձ է արվում այս տարածքներում խթանել տնտեսական գործունեությունը, մյուս կողմից՝ որոշակիորեն թեթևացվում է բնակչության սոցիալական բեռը։
Ժամանակին, երբ կառավարությունը մերժեց սահմանամերձ համայնքների բնակչությանը սոցիալական աջակցություն ցուցաբերելու վերաբերյալ պատգամավոր Ն. Փաշինյանի ներկայացված օրենսդրական նախաձեռնությունը, տպավորություն ստեղծվեց, որ գործադիրը բավարարվելու է միայն տնտեսական միջավայրի բարելավմանն ուղղված քայլերով։ Սակայն արդեն անցած շաբաթվա վերջին հրավիրված արտահերթ նիստում կառավարությունը հավանություն տվեց նաև §Սահմանամերձ համայնքների սոցիալական աջակցության մասին¦ օրենքի նախագծին։
Չնայած պետական բյուջեի նախագծի քննարկումների ընթացքում հնչեցին դժվոհություններ, որ գործադիրը չկատարեց իր խոստումը և սահմանամերձ համայնքների բնակչության սոցիալական վիճակի բարելավմանն ուղղված քայլերը չներառեց հաջորդ տարվա գլխավոր ֆինանսական փաստաթղթում, այնուհանդերձ այդ մտահոգությունները չարդարացան։
Կառավարությունը պատրաստվում է սահմանամերձ համայնքներին տրվող սոցիալական աջակցության ծրագրերը սկսել հաջորդ տարվա սկզբից։ Այն կգործի առաջիկա երեք տարիների համար։ Բայց չի բացառվում, որ շարունակվի նաև հատագայում։
Ծրագրում ներառվելու են 31 համայնքներ։ Թե որքան կարժենա սահմանամերձ համայնքներին տրվող սոցիալական օժանդակությունը, կառավարությունն առայժմ չի բացում փակագծերը։
