Գեղարքունիքի մարզի Մեծ Մասրիկ գյուղում այս տարվա հուլիսից սկսվել եւ ընթանում են խմելու ջրի մատակարարման համակարգի վերակառուցման աշխատանքները, որոնց ավարտից հետո գյուղը հիմնովին կլուծի կանոնավոր եւ շուրջօրյա ջրամատակարարման խնդիրը:

   Ինչպես «Արմենպրես» -ին տեղեկացրեց Մեծ Մասրիկի գյուղապետարանի աշխատակազմի քարտուղար Էդիկ Պողոսյանը, շինարարական աշխատանքներն իրականացվում են ՀՀ կառավարության աշխատակազմի «Գյուղական տարածքների տնտեսական զարգացման ծրագրերի իրականացման գրասենյակ» պետական հիմնարկի կողմից տրամադրած 694 միլիոն դրամի հաշվին: Մեծ Մասրիկի գյուղապետարանի կողմից կատարվելիք համաֆինանսավորումը կազմում է 34 միլիոն 700 հազար դրամ: Ծրագրով նախատեսված է 14 կիլոմետր արտաքին ցանցի, 6 կիլոմետր ներքին ցանցի, 1 քլորակայանի, 1 պահակատան, 4 մարիչ հորերի, 6 դիտահորերի կառուցում:

    «Անցած մեկուկես ամիսների ընթացքում «Մեդիսոն Էյբլ» ՍՊԸ շինարարներն աշխատել են ամբողջ թափով՝ իրականացնելով աշխատանքների ամբողջ ծավալի մոտ 30 տոկոսը: Շինարարությունը ծրագրով նախատեսված է ավարտել երկու տարում, սակայն շինարարները ձգտում են այս տարվա ընթացքում ավարտել հիմնական աշխատանքները: Գյուղի համար այս ծրագիրն ուներ անչափ կարեւոր ու կենսական նշանակություն: Հատկապես արտաքին ցանցի վերակառուցումը խիստ անհրաժեշտ էր, քանի որ կորուստներն այստեղ կազմում էին մոտ 50 տոկոս: Շինարարների կողմից կատարված չափումները ցույց տվեցին, որ 30 լիտր վայրկյան հզորության ջրաղբյուրներից օրվա կարգավորիչ ջրամբար է հասնում մոտ 15 լիտրը:Մեր ունեցած մոտ 16 կիլոմետր ներքին ցանցից վերջին տարիներին տարբեր ծրագրերով նորոգել էինք մոտ 12 կիլոմետրը: Մնացած 4 կիլոմետրը կառուցվում է այն թաղամասերում, որտեղ բացակայել է ներքին ցանցը: Այս ծրագրի ավարտով մենք հիմնովին կլուծենք խմելու ջրի կանոնավոր ու շուրջօրյա մատակարարման խնդիրը: Շուրջօրյա ջրամատակարարում կունենան ոչ միայն բոլոր տնտեսությունները, այլ նաեւ պետական ու մասնավոր հաստատությունները, սպասարկման օբյեկտները, անասնապահական ֆերմաները» -ներկայացրեց Էդիկ Պողոսյանը: